Spread the love



පාර්ලිමේන්තුව තුළ කඩදාසි භාවිතය අවම කරලීම සඳහා කඩදාසි භාවිතා නොකරන පාර්ලිමේන්තුවක් (Paperless Parliament) යන තේමාව යටතේ වැඩ පිළිවෙළක් ජනවාරි මාසයේ සිට ආරම්භ කරන බව පරිසර ඇමති මහින්ද අමරවීර මහතා පවසයි.

පරිසර අමාත්‍ය මහින්ද අමරවීර මහතාගේ අදහසක් පරිදි මෙම වැඩ පිළිවෙළ පිළිබඳ මුළික සාකච්ඡාවක් ඊයේ දින (22) පරිසර අමාත්‍යාංශයේ දී පැවැත්විනි.
පරිසර අමාත්‍ය මහින්ද අමරවීර මහතාගේ ප්‍රධානත්වයෙන් මෙම සාකච්ඡාවට පරිසර අමාත්‍යාංශයේ ලේකම් විශේෂඥ වෛද්‍ය අනිල් ජාසිංහ මහතා සහ පාර්ලිමේන්තුවේ නිලධාරින් කිහිප දෙනෙක් ද සහභාගි වූහ. පාර්ලිමේන්තු මන්ත්‍රී සුරේශ් රාඝවන් මහතා Zoom යෙදවුම මගින් සාකච්ඡාවට එක්විය.
මෙහිදී අදහස් පළ කළ පරිසර අමාත්‍යවරයා පාර්ලිමේන්තුව පැවැත්වෙන හැම දිනයකම විවිධ පොත්පත්, පත්‍රිකා ආදියෙන් සමන්විත මන්ත්‍රීවරුන් නොපෙනෙන තරමට කඩදාසි ගොඩක් මේසය මත ගොඩ ගැසෙන බවත්, එම තත්ත්වය නිසා විශාල පාරිසරික හානිය ක් මෙන්ම සම්පත් නාස්තියක් ද දිනපතා සිදුවන බවත් පෙන්වා දුන්නේය.
කඩදාසි භාවිතයෙන් තොර පාර්ලිමේන්තුවක් Paperless Parliament සඳහා කටයුතු කිරීමට පරිසර අමාත්‍යාංශය වැඩ පිළිවෙළක් යෝජනා කරන බව ද අමාත්‍යවරයා සදහන්
කළේය.
මෙහිදී අදහස් පළ කළ පාර්ලිමේන්තු මන්ත්‍රී සුරේන් රාඝවන් මහතා පාර්ලිමේන්තුව පැවැත්වෙන එක් දිනක් තුළ කිලෝග්‍රෑම් 1200ක කඩදාසි පාර්ලිමේන්තුව තුළ පරිහරණය කරන බවත්, එවැනි කඩදාසි තොගයක් නිපදවීම සඳහා අඩි 40 ගස් 37ක් කැපීමට සිදුවන බවත් අවධාරණය කළේය.
එමනිසා මෙම වැඩ පිළීවෙළ වහාම ක්‍රියාත්මක කිරීමට පියවර ගත යුතු බවද හෙතෙම පැවසීය.
එමෙන්ම හැන්සාඩ් මුද්‍රණය කිරීම සඳහා දෛනිකව රුපියල් මිලියන 10ක පමණ මුදලක් වැය වන බවත් මෙහිදී අවධාරණය විය.
මේ අනුව කඩදාසි භාවිතයෙන් තොර පාර්ලිමේන්තුවක් සඳහා වන වැඩ පිළිවෙළ ක්‍රියාත්මක කිරීම සඳහා පක්ෂ නායක රැස්වීමේ දී පාර්ලිමේන්තු තේරීම් කාරක සභාවක් පත් කිරීමට තමන් කතානායකතුමන්ට යෝජනාවක් ඉදිරිපත් කරන බව පරිසර අමාත්‍ය මහින්ද අමරවීර මහතා පැවසීය. මෙම වැඩ පිළිවෙළ සඳහා ගරු කතානායකතුමන් මෙන්ම සියලුම මන්ත්‍රීවරුන්ගේ සහයෝගය ලබා ගත යුතු බව ද අවධාරණය විය.
මෙම කටයුතු 2022 වසරේ ජනවාරි මාසයේ සිටම ආරම්භ කිරීමට මෙම සාකච්ඡාවේ දී තීරණය විය.