විශ්වවිද්‍යාල කරා ඇතුළුවන අනෙකුත් සිසුනට වඩා වෛද්‍ය සිසුනට විශාල කැපකිරිමක් කිරීමට සිදුවන බවද සංකීර්ණ විෂය ධාරාවකට හා ප්‍රායෝගික පුහුණුවකට වෛද්‍ය සිසුවා මුහුණ දීම අතිශය අභියෝගාත්මක ක්‍රියාවලියක් බවද සෞඛ්‍ය අමාත්‍ය ආචාර්ය කෙහෙලිය රඹුක්වැල්ල මහතා පවසයි.
වෛද්‍ය ශිෂ්‍ය වකවානුවේ මෙන්ම වෛද්‍යවරයෙකු වීමෙන් පසුවද ඉහළ මානසික ඒකාග්‍රතාවයක් නිරන්තරයෙන් තබාගැනීමේ අභියෝගයටද ඔවුන්ට මුහුණ දීමට සිදු වන බවද ඒ මහතා වැඩි දුරටත් පැවසුවේය.
සෞඛ්‍ය ඇමතිවරයා එසේ පැවසුවේ සීමාවාසික වෛද්‍යවරුන් 1401 දෙනෙකු සදහා අද දිනයේ පත්වීම් ලිපි ප්‍රදානය කළ අවස්ථාවේදීය.
විශේෂඥ වෛද්‍යවරුන් යටතේ වසරක සීමාවාසික පුහුණුවක් සඳහා මෙම නිලධාරීන් දිවයින පුරා රෝහල් 64 කට අනුයුක්ත කිරීමට නියමිතය.
සෞඛ්‍ය අමාත්‍ය ආචාර්ය කෙහෙලිය රඹුක්වැල්ල මහතා අතින් මෙම පත්වීම් ප්‍රදානය නාරාහේන්පිට ජාතික රුධිර පාරවිලයන මධ්‍යස්ථානයේදී අද සිදු කෙරිණි.

නිල වශයෙන් මෙහිදී සීමාවාසික වෛද්‍යවරුන් පිරිසකට පත්වීම් ප්‍රදානය කෙරුණු අතර දිවයිනේ විවිධ ප්‍රදේශ වල සිට අනෙකුත් පත්වීම් ලාභීන් මෙම අවස්ථාවට සූම් තාක්ෂණයෙන් එක්ව සිටියහ.
මේ වසරේ ජූනි මාසයේදී තවත් සීමාවාසික පත්වීම් 318 ක් ලබා දුන් අතර ඒ අනුව මෙම වසර තුළ එවැනි පත්වීම් 1719 ක්ද ලබා දීමට සෞඛ්‍ය අමාත්‍යාංශය පියවර ගෙන ඇත. අද ලබා දුන් පත්වීම් අතර 1066 දෙනෙකු ශ්‍රී ලංකාවේ විශ්ව විද්‍යාල තුළ අධ්‍යාපනය හැදෑරූ වෛද්‍ය සිසුන් වන අතර 335 දෙනෙකු විදෙස් විශ්ව විද්‍යාලයන්හි වෛද්‍ය අධ්‍යාපනය හදාරා ඇත.

වසරක සීමා වාසික පුහුණුව සාර්ථකව නිමකෙරෙන වෛද්‍යවරුන් ශ්‍රී ලංකා වෛද්‍ය සභාවේ පූර්ණ ලියාපදිංචියකට ලක් කෙරෙන අතර අනතුරුව මෙරට වෛද්‍යවරයෙකු වශයෙන් කටයුතු කිරීමේ හැකියාව ඔවුනට පවතී.
මේ අතර පශ්චාත් සීමාවාසික වෛද්‍යවරුන් 1505 දෙනෙකු සඳහා වෛද්‍ය නිලධාරී පත්වීම් ලබාදීම පසුගිය 22 දා සිදු කෙරුණු අතර එම වෛද්‍යවරුන් දිවයිනේ ග්‍රාමීය හා පර්යන්ත රෝහල් කරා අනුයුක්ත කෙරිණි.
මේ වන විට මෙරට වෛද්‍ය ක්ෂේත්‍රයේ 22000 ක පමණ වෛද්‍යවරුන් පිරිසක් සිටින අතර සෑම වසරකම 1900-2000 ත් අතර වෛද්‍යවරුන් පිරිසක් වෛද්‍ය ක්ෂේත්‍රයට එක් වේ. එමෙන්ම වසරකට 500 ට ආසන්න වෛද්‍යවරුන් පිරිසක් විශ්‍රාම ගැනීම හෝ විදෙස්ගත වීම සිදු වේ.
වෛද්‍ය වෘත්තිය යනු ලොව ඉතා ශ්‍රේෂඨ වෘත්තියක් බවත් ඒ තුළ විඳ දරා ගැනීමේ හැකියාව ඉතා ඉහළින් පැවතිය යුතු බවත් සෞඛ්‍ය අමාත්‍ය ආචාර්ය කෙහෙලිය රඹුක්වැල්ල මහතා මෙහිදී පැවසීය.