.

නිමල් රාජපක්ෂ-

විදේශ රැකියා ජාවාරම් සම්බන්ධයෙන් ශ්‍රි ලංකා විදේශ සේවා නියුක්ති කාර්යාංශයේ විශේෂ විමර්ශන අංශයේ පොලිස් ඒකකයට ලද පැමිණිලි අනුව ඊයේ දින (10/28) පමණක් විදේශ රැකියා වංචාකරුවන් සිව් දෙනෙකු විමර්ශන නිළධාරීන් විසින් අත්අඩංගුවට ගෙන තිබේ.

කැනඩාවේ සාත්තු සේවා රැකියා ලබාදෙන බව පවසා පුද්ගලයින් අට දෙනෙකුගෙන් රුපියල් එක් කෝටි විසි අට ලක්ෂයක මුදලක් වංචාකළ පුද්ගලයෙකු ඊයේ දින මහරගම ප්‍රදේශයේදී කාර්යාංශයේ විමර්ශන නිළධාරීන් විසින් අත්අඩංගුවට ගන්නා ලදී.

සැකකරු YR Immigration  නමින් ජාත්‍යන්තර උපදේශන ආයතනයක් ගම්පහ වෝට්සිටි ප්‍රදේශයේ පවත්වාගෙන ගොස් ඇති අතර, එමගින් උපදේශන වැඩසටහන් සංවිධානය කරමින් විදේශ රැකියා සඳහා තරුණ තරුණයින් බඳවාගෙන තිබේ. කාර්යාංශයේ වලංගු බලපත්‍රයක් නොමැතිව විදේශ රැකියා ලබාදීම සඳහා මුදල් ලබාගැනීම යන චෝදනාව යටතේ අත්අඩංගුවට ගත් සැකකරු අද දින (10/29) කඩුවෙල මහේස්ත්‍රාත් අධිකරණයට ඉදිරිපත් කිරීමෙන් අනතුරුව ලක්ෂ 5 බැගින් ශරීර ඇප 2ක් මත මුදාහැරීමට මහේස්ත්‍රාත්වරයා නියෝග කරන ලදී.

මේ අතර, ඊශ්‍රායලයේ රැකියා ලබාදෙන බව පවසා දිවයිනේ විවිධ ප්‍රදේශවල පදිංචි පුද්ගලයින්ගෙන් රුපියල් ලක්ෂ 20ක මුදලක් වංචාකළ සැකකරුවෙකු විශේෂ විමර්ශන අංශයේ පොලිස් ඒකකයේ නිළධාරීන් විසින් ඊයේ දින කොට්ටාව ප්‍රදේශයේදී අත්අඩංගුවට ගන්නා ලදී. සැකකරු විදේශ රැකියා ආයතනවල කාර්මික පුහුණු උපදේශකවරයෙකු ලෙස කටයුතු කර ඇති අතර, එම ආයතනයට පැමිණෙන තරුණ තරුණියන් රවටා ඉක්මණින් ඊශ්‍රායලය වෙත යොමු කළ හැකි බව පවසා මුදල් ලබාගෙන ඇත. මෙම සැකකරුට එරෙහිව තවදුරටත් පැමිණිලි ලැබෙමින් පවතින අතර, අත්අඩංගුවට ගත් සැකකරු අද දින (10/29) හෝමාගම මහේස්ත්‍රාත් අධිකරණය වෙත ඉදිරිපත් කරන ලදී. එහිදී සැකකරු වරද පිළිගෙන පැමිණිලිකරුවන්ට යලි මුදල් ගෙවීමට එකග වූ හෙයින් ලක්ෂ 8 ශරීර ඇප මත මුදාහැරීමට මහේස්ත්‍රාත්වරයා නියෝග කළේය.

කාර්යාංශයේ පැය 24 තොරතුරු මධ්‍යස්ථානයට ලද තොරතුරක් අනුව, කාර්යාංශයේ වලංගු බලපත්‍රයක් නොමැතිව ජපන් රැකියා ලබාදීම සඳහා සමාජ මාධ්‍ය ඔස්සේ දැන්වීම් පළකරමින් කොළඹ, කොල්ලුපිටිය ප්‍රදේශයේ ප්‍රසිද්ධ හෝටලයක සම්මුඛ පරීක්ෂණ පැවැත්වූ පුද්ගලයෙකුද ඊයේ දින කාර්යාංශයේ විමර්ශන අංශයේ පොලිස් ඒකකයේ නිළධාරීන් විසින් අත්අඩංගුවට ගන්නා ලදී. ජපන් භාෂා පුහුණු පාසල්වල අධ්‍යාපනය ලබන තරුණ තරුණියන් මේ සදහා සහභාගි කරගෙන ඇති අතර, අදාල හෝටලය තුළදීම සැකකරු අත්අඩංගුවට ගැනීමට විමර්ශන නිළධාරීන් සමත්වී තිබේ. අත්අඩංගුවට ගත් සැකකරු අද දින (10/29) කොටුව මහේස්ත්‍රාත් අධිකරණය වෙත ඉදිරිපත් කළ අතර, එහිදී වරද පිළිගෙන ඇති අතර, නඩුව නොවැම්බර් 12 දිනට කල්තබන ලදී.

එසේම ජපානයේ රැකියාවේ නියුතු පුද්ගලයෙකුගේ බිරිඳක විසින් ජපානයේ රැකියා ලබාදෙන බව පවසා රුපියල් ලක්ෂ 20ක මුදලක් ලබාගත් බවට ලද පැමිණිල්ලක් අනුව අදාළ කාන්තාව විමර්ශන අංශය වෙත කැඳවා ප්‍රකාශ සටහන් කරගැනීමෙන් අනතුරුව ඊයේ දින අත්අඩංගුවට ගන්නා ලදී.  මෙම සැකකාරිය අද දින පානදුර මහේස්ත්‍රාත් අධිකරණය වෙත ඉදිරිපත් කළ අතර,එහිදී වරද පිළිගෙන පැමිණිලි පාර්ශවයට යළි මුදල් ලබාදීමට එකගවිය. ඒ අනුව ඇය ලක්ෂ 10ක ශරීර ඇපයක් මත මුදාහරින ලද අතර, ලබන වසරේ පෙබරවාරි 26 දිනට නඩුව කල්තබන ලදී.

සමාජ මාධ්‍ය ඔස්සේ දැන්වීම් පළකරමින් විදේශ රැකියා ලබාදීම සඳහා මුදල් වංචාකරන සිදුවීම් පිළිබඳව විදේශ සේවා නියුක්ති කාර්යාංශය වෙත ලැබෙන පැමිණිලි දිනෙන් දින ඉහළ යමින් පවතී.  එම දැන්වීම්වලින් බහුතරයක් ව්‍යාජ දැන්වීම් වන අතර, ඒ සඳහා කාර්යාංශයේ අනුමැතියද ලබාගෙන නොමැති බව විමර්ශනවලදී අනාවරණය වී තිබේ. එබැවින් සමාජ මාධ්‍ය ඔස්සේ පළකරනු ලබන මෙවැනි දැන්වීම්වලට අදාළව මුදල් හෝ ගමන් බලපත්‍රය ලබාදීමට පෙර අදාළ ආයතනය කාර්යාංශයේ ලියාපදිංචි වලංගු බලපත්‍රයක් සහිත ආයතනයක්ද, නීත්‍යානුකූල ආයතනයක් නම් අදාළ රැකියාව සඳහා කාර්යාංශයේ අනුමැතියක් ලබාගෙන ඇත්ද යන්න පිළිබඳවත් කරුණු සොයාබලන මෙන් කාර්යාංශය රැකියා අපේක්ෂිතයින්ගෙන් ඉල්ලා සිටියි. එසේම වංචනික ආයතන හෝ වංචනික පුද්ගලයින් පිළිබඳව තොරතුරු දන්නේ නම් කාර්යාංශයේ විශේෂ විමර්ශන අංශයේ පොලිස් ඒකකයේ 0112882228 අංකයට හෝ 1989 ක්ෂණික ඇමතුම් අංකයට දැනුම් දෙන මෙන් කාර්යාංශය වැඩිදුරටත් ඉල්ලා සිටියි.