දිවයිනේ සියලුම පාසල් හා විශ්වවිද්‍යාලවල මත්ද්‍රව්‍ය නිවාරණ කමිටු පිහිටුවීම සඳහා චක්‍රලේඛයක් නිකුත්කරන බව මහජන ආරක්ෂක අමාත්‍ය ආනන්ද විජේපාල මහතා පැවසීය.

කළුතර දිස්ත්‍රික් ලේකම් කාර්යාලයේ අද(16) පැවති වැඩසටහනකට එක්වෙමින් අමාත්‍යවරයා පවසා සිටියේ, අධ්‍යාපන ලේකම්වරයා හරහා හෙට (17) දිනයේදීම එම චක්‍රලේඛ නිකුත් කරන බවය.

ඒ අනුව රාජ්‍ය පරිපාලන ලේකම්වරයා හරහා අමාත්‍යංශ, දෙපාර්තමේන්තු හා සියලු රාජ්‍ය ආයතනවල ද මත්ද්‍රව්‍ය නිවාරණ කමිටු පිහිටුවීම සඳහා හෙට චක්‍රලේඛ නිකුත් කෙරේ.

ජනාධිපති ලේකම්වරයා හරහා සමාජ සවිබල ගැන්වීමේ අමාත්‍යංශ ලේකම්වරයාට රාජ්‍ය නොවන ආයතනවලද මත්ද්‍රව්‍ය නිවාරණ කමිටු ස්ථාපිත කිරීම සඳහා චක්‍රලේඛයක් නිකුත්කිරීමට උපදෙස් ලබාදී තිබේ.

මත්ද්‍රව්‍ය තුරන් කිරීමේ ජාතික මෙහෙයුමට සමගාමීව රාජ්‍ය ආයතනවල ජාතික මෙහෙයුම් කමිටු පිහිටුවීමේ වැඩසටහනට සමගාමීව මෙය සිදු කිරීමට නියමිතය.

එමෙන්ම 1818 ඇමතුම් අංකයට අදාළ මත්ද්‍රව්‍ය ජාතික සභාව සඳහා වූ කාර්යාලය එළැඹෙන 22වනදා ටොරින්ටන්හිදී විවෘතකරන බවද ආනන්ද විජේපාල මහතා මෙහිදී පැවසීය.

මෙහිදී අදහස් දැක් වූ අමාත්‍ය ආනන්ද විජේපාල මහතා,

”මේ ප්‍රශ්නේ බැරෑරුම් තත්ත්වයකට උඩු දුවලා. අනර්ථයක් සමාජයට අත්පත් කරගනිමින් තියෙනවා. රජය හැටියට අපි කල්පනා කළා මේ ප්‍රශ්නය සමාජයෙන් ඉවත් කරන්න” යැයි පැවසීය.