පවතින අධික වර්ෂාපතනය හමුවේ අත්තනගලු ඔය ආශ්‍රිතව සුළු ගංවතුර තත්ත්වයක් දක්වා වර්ධනය විය හැකි බව වාරිමාර්ග දෙපාර්තමේන්තුවේ අධ්‍යක්ෂ, ජල විද්‍යා හා ආපදා කළමණාකරන ඉංජිනේරු එල්.එස්. සූරියබණ්ඩාර මහතා පවසයි.

ඊයේ (21) රාත්‍රියේ සිට ඇද හැලෙන වර්ෂාපතනය හමුවේ ගංගා ද්‍රෝණි කිහිපයක ජල මට්ටම් ඉහළ ගොස් තිබේ.

ඒ අනුව දූනමලේ මිනුම් මධ්‍යස්ථානයට අනුව මේ වන විට මිලිමීටර් 200 ඉක්මවූ වැසි වාර්තා වී ඇති බවත් ඉහළ ද්‍රෝණියේ ඇතැම් ස්ථානවලට මිලිමීටර් 250ට ඉක්මවූ වැසි වාර්තා වී ඇති බවත් ඒ මහතා සඳහන් කළේය.

මේ හේතුවෙන් ගම්පහ, කටාන, වත්තල වැනි පහත්බිම් ජලයෙන් යටවීමේ අවධානමක් පවතින බවද ඒ මහතා පෙන්වා දුන්නේය.

එමෙන්ම ඇතැම් ස්ථාන සඳහා මිලිමීටර් 200-300ත් අතර වර්ෂාපතනයක් වාර්තා වී ඇති බවත් පැවසූ ඉංජිනේරු එල්.එස් සූරියබණ්ඩාර මහතා මේ සම්බන්ධව පවතින ඉදිරි තත්ත්වයන් පිළිබඳව දැනුවත් කිරීමට පියවර ගන්නා බවද සඳහන් කළේය.