නිමල් රාජපක්ෂ

මන්නාරම, කීරි වෙරළ ප්‍රදේශයේ පෙරේදා ( 06) අළුයම් කාලයේ සිදුකල විශේෂ සෝදිසි මෙහෙයුමකදී, නීති විරෝධි ලෙස මෙරටට රැගෙන ඒමට උත්සහ කල ඖෂධ පෙති පනස් හයදහස් අටසිය හැත්තැවක (56,870) තොගයක් සහ රූපලාවන්‍ය ද්‍රව්‍ය හා කුළුබඩු තොගයක් රැගත් ඩිංගි යාත්‍රාවක් (01) සමඟ සැකකරුවෙක් (01) නාවික හමුදා භාරයට ගෙන ඉදිරි නීතිමය කටයුතු සඳහා යොමු කිරීමට කටයුතු කෙරිණි.

මුහුදු මාර්ගයෙන් සිදු කෙරෙන ජාවාරම් ඇතුළු විවිධ නීති විරෝධී ක්‍රියා මැඩපැවැත්වීම සඳහා නාවික හමුදාව දිවයින වටා වෙරළ හා මුහුදු තීරය ආවරණය වන පරිදි නිරන්තර මුර සංචාර සහ සෝදිසි මෙහෙයුම් සිදු කරනු ලබයි.

ඒ අනුව, උතුරු මැද නාවික විධානයේ ශ්‍රී ලංකා නාවික නෞකා ගජබා ආයතනයට අයත් තාල්පාඩු නාවික අණුඛණ්ඩය මඟින්, මන්නාරම, කීරි වෙරළ ප්‍රදේශයේ සිදුකල මෙම විශේෂ සෝදිසි මෙහෙයුමේදී, මෙම උපකරණ සමගින් සැකකරුවකු කොටු කර ගැනීමට සමත්වි ඇත.

තවද, මෙම මෙහෙයුම මඟින් නාවික හමුදා භාරයට ගත් සැකකරු මන්නාරම, තාල්පාඩු ප්‍රදේශයෙහි පදිංචිකරුවෙකු බවට හඳුනාගෙන තිබේ.

අත්අඩංගුවට ගත් සැකකරු, ඖෂධ පෙති, රූපලාවන්‍ය ද්‍රව්‍ය, කුළුබඩු සහ ඩිංගි යාත්‍රාව ඉදිරි නීතිමය කටයුතු සඳහා යාපනය රේගු දෙපාර්තමේන්තු කාර්යාලය වෙත භාරදීමට නාවික හමුදාව පියවර ගෙන ඇත.