නිමල් රාජපක්ෂ-
ආසියානු රග්බි එමිරේට්ස් සත් සාමාජික තරගාවලියේ අවසන් අදියර අඛාණ්ඩව දෙවැනි වසරටත් ශ්‍රී ලංකාවේදී පැවැත්වීමට නියමිතය. ඒ අනුව මේ මස 17 සහ 18 යන දෙදින කොළඹ තුරඟ තරග පිටියේදී මෙම තරගාවලිය පැවැත්වේ.
2025 වසරේදී මෙම තරගාවලිය සාර්ථකව පැවැත්වීමෙන් අනතුරුව ශ්‍රී ලංකාව යළිත් වරක් ආසියාවේ ප්‍රමුඛ පෙළේ ජාතික රග්බි සත් සාමාජික කණ්ඩායම් පිළිගැනීමට සූදානම් වෙයි. තරගාවලියේ අවසන් අදියර වන මෙම තරග දෙදින තුළ පිරිමි කණ්ඩායම් 12ක් සහ කාන්තා කණ්ඩායම් 12ක් එක්ව තරග වදින අතර, රටවල් සහ සංගම් 13ක් නියෝජනය කරමින් සහභාගී වන කණ්ඩායම් අතරින් 2026 තරගාවලියේ ශූරයන් තීරණය කෙරේ.
චීනයේ සුෂෝ නගරයේ පැවැති පළමු වටයෙන් අනතුරුව කලාපීය ගෞරවය වෙනුවෙන් තරග වැදීමට කණ්ඩායම් යළිත් ශ්‍රී ලංකාවට පැමිණෙයි. මෙය සත්කාරක ශ්‍රී ලංකා පිරිමි හා කාන්තා කණ්ඩායම්වලට තම මව්බිමේදී ක්‍රීඩා ලෝලීන් ඉදිරියේ දස්කම් දැක්වීමට ලැබෙන වැදගත් අවස්ථාවකි.
පිරිමි තරගාවලිය සඳහා චීනය, හොංකොං චීනය, ඉන්දියාව, ජපානය, කසකස්තානය, කොරියාව, මැලේසියාව, සිංගප්පූරුව, ශ්‍රී ලංකාව, තායිලන්තය, එක්සත් අරාබි එමීර් රාජ්‍යය සහ උස්බෙකිස්තානය යන කණ්ඩායම් සහභාගී වෙති.
කාන්තා තරගාවලිය සඳහා ද එම රටවල් රැසක් සහභාගී වන අතර, ඉරානය ද එයට එක්වීම විශේෂත්වයකි. ඒ අනුව චීනය, හොංකොං චීනය, ඉන්දියාව, ඉරානය, ජපානය, කසකස්තානය, මැලේසියාව, සිංගප්පූරුව, ශ්‍රී ලංකාව, තායිලන්තය, එක්සත් අරාබි එමීර් රාජ්‍යය සහ උස්බෙකිස්තානය කාන්තා තරගාවලියට එක්වෙති.
ආසියානු රග්බි එමිරේට්ස් සත් සාමාජික කුසලාන තරගාවලිය හරහා උසස්වීම් ලබාගත් ඉරාන කාන්තා කණ්ඩායම මෙවර තරගාවලියට සහභාගී වන්නේ සිය පළමු තරග වාරය වෙනුවෙනි. එමෙන්ම උසස්වීම් ලැබූ උස්බෙකිස්තාන කාන්තා කණ්ඩායම සහ ඉන්දීය හා කසකස්තාන පිරිමි කණ්ඩායම්වල සහභාගීත්වය ද ආසියාව පුරා ජාත්‍යන්තර රග්බි සත් සාමාජික ක්‍රීඩාවේ ව්‍යාප්තිය ඉහළ යමින් පවතින බව පෙන්නුම් කරයි.
වීඩියෝව නරඹන්න,
NIMAL RAJAPAKSHA -0777 305 751
srarajnews@gmail.com
nimalrajapaksha2@gmail.com
ඹබගේ ආයතන ,ව්‍යාපාරික , කලා කටයුතු හා නිර්මාණ කටයුතු ඉතා පහසු හා අඩුම මිලට පළකර ගැනීම සදහා අප මාධ්‍ය ආයතනය අමතන්න