නිමල් රාජපක්ෂ-

ශ්‍රී ලංකාව සහ ජපානය අතර අන්‍යෝන්‍ය විශ්වාසය හා ගෞරවය මත පදනම් වූ දශක ගණනාවක මිත්‍රත්වය තවදුරටත් තහවුරු කරමින්, දෙරට අතර ආර්ථික සබඳතා සහ කාර්මික සහයෝගීතාව පුළුල් කිරීමේ අරමුණින් ශ්‍රී ලංකා – ජපන් ඛනිජ අංශ සමළුව ඔක්තෝබර් 14 වන දින ටෝකියෝ නගරයේදී පවත්වන ලදී. කර්මාන්ත හා ව්‍යවසායකත්ව සංවර්ධන අමාත්‍ය සුනිල් හඳුන්නෙත්ති මහතාගේ ප්‍රධානත්වයෙන් පැවති මෙම සමළුව සඳහා ජපාන රජයේ නියෝජිතයින්, JETRO, JOGMEC, JICA සංවිධාන, ප්‍රමුඛ පෙළේ ජපන් ආයෝජකයින් සහ ව්‍යාපාරික නායකයින් රැසක් සහභාගී වූහ.

​මෙහිදී අදහස් දැක්වූ අමාත්‍යවරයා, 1962 වසරේදී ජපානය වෙත පළමු ඉල්මනයිට් නැව්ගත කිරීම සිදු කරමින් ඇරඹුණු දෙරටේ ඓතිහාසික වාණිජ සබඳතා සිහිපත් කළේය. වත්මන් රජය යටතේ රට තුළ ස්ථාපිත වී ඇති ස්ථාවර දේශපාලන පරිසරය, නීතිය හා සාමය මෙන්ම විනිවිදභාවය හේතුවෙන් ශ්‍රී ලංකාව ජපන් ආයෝජකයින් පිළිගැනීමට ඉතා යෝග්‍ය තත්ත්වයක පවතින බව ඔහු අවධාරණය කළේය. එපමණක් නොව, 2030 වන විට ඇමරිකානු ඩොලර් බිලියන 36ක අපනයන ආදායම් ඉලක්කය කරා ළඟාවීමේදී මෙරට ඛනිජ අංශයට විශාල දායකත්වයක් ලබා දිය හැකි බව හෙතෙම සඳහන් කළේය.

​ග්‍රැෆයිට්, මිනරල් සැන්ඩ්ස්, ක්වාර්ට්ස් සහ සිලිකා වැනි ඛනිජ සම්පත් බොරද්‍රව්‍ය ලෙස අපනයනය කිරීමෙන් ඔබ්බට ගොස්, අගය එකතු කිරීම සහ උසස් නිෂ්පාදන හරහා ගෝලීය වෙළඳපොළට පිවිසීම රජයේ අපේක්ෂාවයි. උසස් තාක්ෂණය හා විශේෂඥ දැනුම ඇති ජපානය මෙම ගමනේ කදිම උපායමාර්ගික හවුල්කරුවෙකු වන අතර, නව ජාතික ඛනිජ ප්‍රතිපත්තිය හරහා වගකිවයුතු ආයෝජන සඳහා අවශ්‍ය රාමුව සකසා ඇති බව අමාත්‍යවරයා පෙන්වා දුන්නේය. අවසාන වශයෙන්, සම්පත් හඳුනාගෙන, තාක්ෂණය ගෙනැවිත්, ශ්‍රී ලංකික හවුල්කරුවන් සමඟ එක්ව ව්‍යාපාර ගොඩනඟන ලෙස හෙතෙම ජපන් ආයෝජකයින්ට උණුසුම් ලෙස ආරාධනා කළේය.