ජනතාව කේන්ද්‍ර කරගත් ශක්තිමත් ප්‍රාථමික සෞඛ්‍ය සේවාවක් සදහා ආයෝජන අප සැමවිටම දිරිමත් කළයුතු යැයි සෞඛ්‍ය හා ජනමාධ්‍ය අමාත්‍යවරයා පැවසී ය.

ශ්‍රී ලංකාවේ පවුලේ වෛද්‍යවරුන්ගේ විද්‍යාලයේ (College of General Practitioners of Sri Lanka – CGPS) 50 වන වාර්ෂික අධ්‍යයන සැසිවාරයේ සමාරම්භක උත්සවය පසුගිය දා කොළඹ ගලධාරි හෝටලයේ දී පැවැත් වූ අතර, එම අවස්ථාවට ප්‍රධාන ආරාධිතයා ලෙස එක්වෙමින් සෞඛ්‍ය හා ජනමාධ්‍ය අමාත්‍ය වෛද්‍ය නලින්ද ජයතිස්ස මහතා මෙම අදහස් ප්‍රකාශ කරන ලදී.

මෙවර සැසිවාරයේ තේමාව වුයේ “පවුලේ වෛද්‍යවරයා කේන්ද්‍ර කරගනිමින් ප්‍රාථමික සෞඛ්‍ය සේවාව නව්‍යකරණය කිරීම.” (Transforming Primary Care: General Practitioners at the Heart of the Community) යන්නයි.

ශ්‍රී ලංකා පවුලේ වෛද්‍යවරුන්ගේ විද්‍යාලයේ 50 වන වාර්ෂික අධ්‍යයන සැසිවාරය රට පුරා සහ ඉන් ඔබ්බට සිටින පවුලේ වෛද්‍යවරුන්, විශේෂඥයින් සහ සෞඛ්‍ය සේවා වෘත්තිකයන් අතර දැනුම හුවමාරුව, වෘත්තීය සංවර්ධනය සහ සහයෝගීතාවය සඳහා සුවිශේෂී වේදිකාවක් සපයනු ලැබීය.

ප්‍රතිපත්ති සම්පාදකයින් ලෙස, අප කළ යුත්තේ ප්‍රාථමික සෞඛ්‍ය, මහජන සෞඛ්‍ය සේවා සමඟ වඩාත් පුළුල් ලෙස ඒකාබද්ධ කිරීම, වඩාත් පුළුල් හා අඛණ්ඩ සත්කාර ලබාදීමේ හැකියාව වැඩි දියුණු කරන තාක්ෂණය, පුහුණුව සහ සහායක පද්ධති සමඟ සාමාන්‍ය වෘත්තිකයන් සන්නද්ධ කිරීම එහි දී ප්‍රමුඛ වන බව ද අමාත්‍යවරයා පැවසී ය.එමෙන්ම වෛද්‍යවරුන්, විවිධ විශේෂඥයින්, හෙදියන්, ඖෂධවේදීන් සහ ප්‍රජා සෞඛ්‍ය සේවකයින් අතර බහුවිධ සහයෝගීතාව වර්ධනය කිරීම මෙන් ම වෛද්‍ය අධ්‍යාපනය සහ පශ්චාත් උපාධි පුහුණුව ශක්තිමත් කිරීම අතිශය වැදගත් බව ද මෙහි දී අමාත්‍යවරයා අවධාරණය කළේ ය.

සෞඛ්‍ය සේවා සැපයීමේ කේන්ද්‍රයේ පවුලේ වෛද්‍යවරුන් තබන මුලපිරීම් සඳහා සහාය දැක්වීමටත්, අදහස්, නවෝත්පාදන සහ උපදේශනය තුළ දිරිමත් කිරීමට තමා කැපවී සිටින බව පෙන්වා දුන් අමාත්‍යවරයා “ශක්තිමත් ප්‍රාථමික සත්කාර සේවා වඩා හොඳ ප්‍රතිඵල, අඩු පිරිවැය සහ සෞඛ්‍ය සම්පන්න ප්‍රජාවන්ට මඟ පාදයි” යන යථාර්ථය අපගේ ප්‍රතිපත්ති මගින් පිළිබිඹු කළ යුතු යැයි තමන් විශ්වාස කරන බව ද සෞඛ්‍ය හා ජනමාධ්‍ය අමාත්‍යවරයා මෙහි දී වැඩිදුරටත් පැවසී ය.

ශ්‍රී ලංකා පවුලේ වෛද්‍යවරුන්ගේ විද්‍යාලය (CGPSL) යනු පවුල් වෛද්‍යවරුන්ගේ ඉහළම, වෘත්තීය, අධ්‍යයන ආයතනය වන අතර එය 1969 දී ආරම්භ විය.

විද්‍යාලයේ මූලික අරමුණ වන්නේ පවුල් වෛද්‍ය විද්‍යාව අධ්‍යයන විෂයයක් ලෙස පිළිගැනීමක් ලබා ගැනීම වන අතර විද්‍යාලයේ අධ්‍යාපන කටයුතු ශ්‍රී ලංකාවේ පවුල් වෛද්‍ය විද්‍යාවේ වඩා හොඳ ප්‍රමිතීන් සඳහා සාමූහිකව දායක වී ඇත. විද්‍යාලය ශ්‍රී ලංකා පවුල් වෛද්‍යවරයා නමින් තමන්ගේම සඟරාවක් ප්‍රකාශයට පත් කරන අතර එයට තමන්ගේම පුවත් පත්‍රිකාවක් සහ වෙබ් අඩවියක් ඇත.

මෙම අවස්ථාවට විද්‍යා හා තාක්ෂණ අමාත්‍ය ක්‍රිෂාන්ත අබේසේන, ශ්‍රී ලංකා පවුලේ වෛද්‍යවරුන්ගේ විද්‍යාලයේ සභාපති වෛද්‍ය පුෂ්පා වීරසිංහ, උප සභාපති එච්.ඩී විඡේසිංහ, ලේකම් වෛද්‍ය දිලිනි බරණගේ ඉන්දියාවේ පවුල් වෛද්‍යවරුන්ගේ ඇකඩමියේ ආරම්භක සභාපති Dr. Raman Kumar මහතා මෙන් ම ලංකා පවුලේ වෛද්‍යවරුන්ගේ විද්‍යාලයේ සභා සාමාජිකයින් ඇතුළු පිරිසක් එක්ව සිටියහ.