නිමල් රාජපක්ෂ                   

අ.පො.ස. උසස් පෙළ විභාගයෙන් විශිෂ්ට දක්ෂතා දැක්වූ සිසුන් දිස්ත්‍රික් මට්ටමින් ඇගයීමට ලක් කිරීම සඳහා ජනාධිපති අරමුදල මගින් ක්‍රියාත්මක කරනු ලබන වැඩසටහනේ 2025 උසස් පෙළ විශිෂ්ටයින් ඇගයීමේ පළමු වැඩසටහන අද (26) පෙරවරුවේ කිලිනොච්චියේදී පැවැත්විණි.

ජනාධිපති අනුර කුමාර දිසානායක මහතාගේ සභාපතිත්වය යටතේ ජනාධිපති අරමුදලේ නව වැඩසටහනක් ලෙස 2025 වර්ෂයේදී ආරම්භ කළ මෙම වැඩසටහන යටතේ 2023/2024 අධ්‍යයන වර්ෂයට අදාළ අ.පො.ස. උසස් පෙළ විභාගයේදී සෑම විෂය ධාරාවකින්ම විශිෂ්ට දක්ෂතා දැක්වූ සිසුන් දිස්ත්‍රික් මට්ටමින් ඇගයීමට ලක් කරන ලදී. එහිදී එක් එක් විෂය ධාරාවෙන් ඉහළම ප්‍රතිඵල ලබාගත් සිසුන් දසදෙනෙකු බැගින් ඇගයීමට ලක් කළ අතර, මෙවර එම සංඛ්‍යාව සිසුන් විසිදෙනෙකු දක්වා ඉහළ නැංවීම විශේෂත්වයකි.

දිවයිනේ සියලු දිස්ත්‍රික්ක ආවරණය වන පරිදි සිසුන් 3,000කට ආසන්න පිරිසක් මෙවර ඇගයීමට ලක් කෙරෙන අතර, එම සෑම සිසුවෙකුටම රුපියල් 100,000ක මූල්‍යාධාර සමග ඇගයීම් සහතික පත්‍රයක් පිරිනැමීමට නියමිතය.

ඒ අනුව උතුරු පළාතේ යාපනය, කිලිනොච්චිය, මන්නාරම, වවුනියාව සහ මුලතිව් යන දිස්ත්‍රික්ක 05හි විෂයධාරා 06 යටතේ පළවන ස්ථානයේ සිට විසිවන ස්ථානය දක්වා ලබාගත් සිසුන් 480 දෙනෙකු මෙහිදි ඇගයීමට ලක් කෙරිණි.

මෙහිදී අදහස් දැක්වූ කථානායක වෛද්‍ය  ජගත් වික්‍රමරත්න මහතා පෙන්වා දුන්නේ රටේ දරුවන්ගේ අධ්‍යාපනය වෙනුවෙන් වත්මන් රජය උපරිම දායකත්වයකින් සහ කැපවීමකින් කටයුතු කරමින් සිටින බවයි. එම ගමනේදී ශක්තිමත් දායකත්වයක් සපයන ජනාධිපති අරමුදල ආර්ථික අපහසුතා ඇති පවුල්වල දුවා දරුවන්ගේ අධ්‍යාපනය වෙනුවෙන් වැඩසටහන් රැසක් දියත් කර තිබෙන බවත්, මේ වසරේ එම වැඩසටහන් තවදුරටත් පුළුල් කර තිබෙන බවත් කථානායකවරයා පෙන්වා දුන්නේය.

මෙහිදී වැඩිදුරටත් අදහස් දැක්වූ කථානායක වෛද්‍ය ජගත් වික්‍රමරත්න මහතා

“රටේ අනාගත පරපුර කියන්නේ පළමුවත්, දෙවනුවත්, තෙවනුවත් රටේ ජීවනාලියයි. එහිදී අධ්‍යාපනය ඉතා වැදගත් වෙනවා. ඒ සඳහා වත්මන් රජය උපරිම දායකත්වයක් සහ කැපකිරීමක් සිදු කරමින් සිටිනවා. එම ගමනට දායක වීම වෙනුවෙන් ජනාධිපති අරමුදල ඉතා වෙහෙසකර සහ අධිෂ්ඨානශීලී පියවර රැසක් මේ වන විට ගෙන තිබෙනවා.