‘දේවින්ද පිණිදිය
‘ක්ලීන් ශ්රී ලංකා’ සංකල්පය යටතේ සමාජීය සහ පාරිසරික වශයෙන් උසස් මට්ටමක පවතින, ඩිජිටල් සේවා පහසුකම් සහිත නව ආදර්ශ නගර (Model Cities) නිර්මාණය සඳහා සැලසුම් සකස් කරමින් පවතින අතර, ජනාධිපති ලේකම් ආචාර්ය නන්දික සනත් කුමානායක මහතාගේ ප්රධානත්වයෙන් ඊයේ (28) ජනාධිපති කාර්යාලයේදී ‘ක්ලීන් ශ්රී ලංකා’ කාර්යසාධක බලකාය රැස් වූ අවස්ථාවේදී ඒ පිළිබඳ වැදගත් තීරණ රැසකට එළැඹිණි.
මෙම නගර සංවර්ධන වැඩසටහන වඩාත් ප්රායෝගික සහ විද්යාත්මක පදනමකින් ක්රියාත්මක කිරීම සඳහා මොරටුව විශ්වවිද්යාලයේ පූර්ණ තාක්ෂණික සහාය ලබා ගැනීමට එහිදී තීරණය විය. මීට සමගාමීව, නගර නිර්මාණය සම්බන්ධයෙන් ජාත්යන්තර ප්රමිතීන්ට අනුකූල මාර්ගෝපදේශ මාලාවක් සකස් කිරීම සඳහා මොරටුව විශ්වවිද්යාලයේ ආචාර්ය සිතුමිණි රත්නමලල මහතාගේ ප්රධානත්වයෙන්ද, ‘ක්ලීන් ශ්රී ලංකා’ කාර්යසාධක බලකායේ ක්රියාකාරී සාමාජිකයින් කිහිප දෙනෙකුගෙන් සහ ක්ෂේත්රයේ විද්වතුන් කිහිප දෙනෙකුගෙන්ද යුතු විශේෂ විද්වත් කමිටුවක් පත් කෙරිණි.
මෙම ව්යාපෘතියේ මූලික අදියරේදී, ලෝකයේ සාර්ථක නගර නිර්මාණ ආකෘතීන් අධ්යයනය කර මෙම කමිටුව විසින් සකස් කරනු ලබන විද්යානුකූල මාර්ගෝපදේශ පදනම් කරගෙන, ආදර්ශ නගර කිහිපයක් ප්රායෝගිකව නිර්මාණය කිරීමට අපේක්ෂිතය. අනතුරුව, දිවයිනේ අනෙකුත් නගර නවීකරණය සඳහා වන විද්යාත්මක මාර්ගෝපදේශ මාලාව සකස් කිරීමට අපේක්ෂා කෙරේ.
මෙම ආදර්ශ නගර ව්යාපෘතිය හුදෙක් භෞතික සංවර්ධනයට පමණක් සීමා නොවන අතර, ‘ක්ලීන් ශ්රී ලංකා’ ජාතික වැඩපිළිවෙළෙහි මූලික අරමුණු අනුව යමින්, එම නගරවල වෙසෙන ජනතාව ආචාරධාර්මික වශයෙන් උසස් ප්රජාවක් බවට පත් කිරීම කෙරෙහිද විශේෂ අවධානයක් යොමු කෙරේ. ඒ අනුව, උසස් මානුෂීය සහ සමාජීය සාරධර්මවලින් අනූන, එකිනෙකාට ගරු කරන යහපත් නාගරික ප්රජාවක් ගොඩනැගීමට මෙන්ම, පරිසර හිතකාමී සංකල්ප මත පදනම් වූ, පිරිසිදු නාගරික පරිසරයක් නිර්මාණය කිරීමටද අපේක්ෂා කෙරේ.
එසේම, මහජනතාවට අවශ්ය සේවා කඩිනමින් සහ විනිවිදභාවයෙන් යුතුව ලබා දීම සඳහා නවීන තාක්ෂණයෙන් බලගැන්වුණු පුළුල් ඊ-සේවා ජාලයක් නගරය තුළ ස්ථාපිත කිරීමට බලාපොරොත්තු වේ. කැළිකසළ කළමනාකරණය, විද්යානුකුලව සහ ක්රමවත්ව සිදු කිරීමට උපදෙස් ලබා දීම සඳහා විද්වත් කමිටුවක් පත් කර, එම උපදෙස් දීපව්යාප්තව ක්රියාවේ යෙදවීමටද සැලසුම් කර තිබේ .
මෙම අවස්ථාවට, ක්ලීන් ශ්රී ලංකා ලේකම් කාර්යාලයේ කැඳවුම්කරු, ජනාධිපති ජ්යෙෂ්ඨ අතිරේක ලේකම් රසල් අපොන්සු මහතා සහ එම කාර්යාලයේ අධ්යක්ෂවරුද, යුධ හමුදාපති ලුතිනන් ජෙනරාල් ලසන්ත රොද්රිගෝ, ගුවන් හමුදාපති එයාර් මාර්ෂල් වාසු බන්දු එදිරිසිංහ, නාවික හමුදාපති වයිස් අද්මිරාල් කාංචන බානගොඩ යන මහත්වරුද, ක්ලීන් ශ්රී ලංකා කාර්යසාධක බලකායේ සාමාජිකයෝද එක්ව සිටියහ.