ජනපතිවරුන්ගේ හිමිකම් ඉවත් කිරීමේ පනත් කෙටුම්පත ගැසට් පත්රයක් මගින් අද (31) දින නිකුත් කර තිබෙනවා.
ඒ අධිකරණ සහ ජාතික ඒකාබද්ධතා අමාත්යවරයාගේ නියමය පරිදියි.
ඒ අනුව, හිටපු ජනාධිපතිවරයෙකුට හෝ හිටපු ජනාධිපතිවරයෙකුගේ වැන්දඹුවකට ඕනෑම වාසස්ථානයක්, මාසික දීමනාවක්, මාසික ලේකම් දීමනාවක්, නිල ප්රවාහනයක් සහ එවැනි වෙනත් පහසුකම් සැපයීම එමගින් අත්හිටුවා තිබෙනවා.
තවද, හිටපු ජනාධිපතිවරයෙකුගේ වැන්දඹුවකට ගෙවනු ලබන මාසික විශ්රාම වැටුප ද එම පනත් කෙටුම්පත මගින් අත්හිටුවා තිබෙනවා.
මෙම පනත් කෙටුම්පත ගැසට් කර දින 7 කට පසු එය පාර්ලිමේන්තුවේ පළමුවර කියවීම සඳහා ඉදිරිපත් කළ හැකියි.
ඉන්පසු දින 14ක් යනතුරු ඕනෑම පුරවැසියෙකුට ඒ සම්බන්ධයෙන් ශ්රේෂ්ඨාධිකරණයට පෙත්සමක් ඉදිරිපත් කිරීමටද හැකියාව පවතිනවා.
එම පෙත්සම් තීන්දුව සති තුනක් තුළ කථානායකවරයා වෙත දැනුම්දිය යුතු අතර, අනතුරුව දෙවන වර සහ තුන්වනවර කියවීම පාර්ලිමේන්තුවේදී සිදුකරනු ඇති.
අධිකරණ ක්රියාමාර්ගයක් ගනු නොලැබුවේ නම් කෙටුම්පත ආංශික අධීක්ෂණ කමිටුවට ඉදිරිපත් කර එය සම්මත කර ගැනීම සම්බන්ධ ඉදිරි පියවර ගැනීම සිදු කෙරෙනවා.
